Hangið á völdum eins og hundur á roði

Sjálfstæðismenn mega ekki til þess hugsa að þjóðin hafi eitthvað um grundvallarlöggjöf landsins að segja.  Þeir eru dauðhræddir við að almenningur fái að hafa hönd í bagga við að semja nýja stjórnarskrá.  Þeim þykir það ekkert tiltökumál að ráðast á forsetaembættið hvenær sem þeim hentar og grafa undan því.  En ef ræða á grundvallarbreytingar á stjórnarskrá sem er orðin 130 ára gömul að stofni til verða þeir æfir.

Stjórnarskráin var samin í Danmörku á sínum tíma þegar völd konungs voru mun meiri en þau eru í dag.  Uppbygging stjórnkerfisins á Íslandi endurspeglar 130 ára gömul viðmið.  Íhaldsmennirnir vilja halda því fyrirkomulagi.   Það tryggir óeðlilegt ráðherraræði og völd embættismanna langt umfram það sem eðlilegt getur talist. 

Þetta kerfi á nú að verja með málþófi og Morfísæfingum í dag.  Er það ekki endanleg sönnun þess að það er komin tími á að gefa þessum valdagíruga flokki langt frí frá landsstjórninni.  Í Reykjavík voru íhaldsmennirnir settir í frí í 12 ár.   Kannski er komin tími á samskonar frí frá landsstjórninni. 

Sjálfstæðisflokkurinn virðir vilja þjóðarinnar um aðkomu að eigin málum að vettugi.   Þeir hafa nú sett upp á heimasíðu sína dæmalausa upptalningu um andstöðu margra aðila við breytingarnar.

Það vekur athygli mína að þeir finna eina og eina setningu sem þeir taka síðan úr öllu samhengi og  túlka sem andstöðu við allt málið í heild.   Ef þetta er það eina sem þeir finna þá blasir við að það er engin raunveruleg andstaða við málið nema í innsta kjarna Sjálfsstæðisflokksins og hjá embættismönnum skipuðum í skjóli flokksins.

Vilja vísa stjórnarskrármáli frá

Athugasemdir

[G. Valdimar Valdemarsson, 2.4.2009 kl. 13:27]

Birgir

Það er ekki eins og það hafi ekki verið reynt að breyta stjórnarskránni undanfarin ár.   Það var í stjórnarsáttmála Sjálfstæðisflokks og Framsóknarflokks 2003 en íhaldið kom í veg fyrir það þrátt fyrir að til þess væru ætluð 4 ár.    Fyrirslátturinn er alltaf sá sami.  Það má ekki breyta kerfinu það hentar flokknum svo vel.   Talið um 6 ára krakkana er bara eitt dæmið enn um valdahrokann og yfirganginn sem einkennir þennan málflutning.

Og eitt að lokum, eflaust talar íhaldið um kostnað við stjórnlagaþing en það er rétt að setja það í samhengi við gjafirnar til fjármagnseigenda sem voru afgreiddar í skjóli nætur af íhaldi og Samfylkingu.  200 milljarðar í peningamarkaðssjóðina.  Þar af 11.000 milljónir fyrir mannorð Illuga Gunnarssonar í sjóði 9.

[Sigurður Geirsson, 2.4.2009 kl. 14:18]

Birgir.

Þú segjist styðja Framsóknarflokkinn og kennir sjálfstæðismönnum um allt sem miður hefur farið. Í því sambandi langar mig að spyrja þig hver var í stjórn með sjálfstæðismönnum á þessum tíma?? Hvaða flokkur var með viðskiptaráðuneytið þegar bankarnir voru seldir?? Hver seldi áhangendum (þ.e. einkavinum) Búnaðarbankann, sem síðar varð Kaupþing??? Hvað kostað það þjóðina og fyrir hvern var það??? Og hver hefur beðist afsökunar á þætti sínum í því?? Ég veit að sjálfstæðismenn hafa gert það en hvernig er með framsóknarmennina???

Ef við tölum um að einhverjir hafi hangið á völdum eins og hundur á roði, hefur þú þá skoðað þátttöku framsóknarmanna í ríkisstjórn og hversu lengi þeir hafa verið. Hver er þar að hanga á völdum???

 Auðvitað þarf að gera breytingar á stjórnarskránni og það vita meira að segja sjálfstæðismenn og hafa sennilega manna lengst talað um að þær breytingar væru nauðsynlegar. En er það málið sem við þurfum núna, þ.e. akkúrat núna að fá í gegn?? Er það akkúrat það sem við þurfum að eyða peningunum okkar í?? Og að lokum ef almenningur á að ákveða nýja stjórnarskrá með setu á stjórnlagaþingi af hverju telja flutningsmenn frumvarpsins þá nauðsynlegt að gera núna breytingar á stjórnarskránni, í stað þess að láta almenning um það. Er þetta ekki enn einn svartigaldurinn, látum almenning halda að hann hafi eitthvað um þetta að segja en breytum strax því sem við teljum að breyta þurfi og notum til þess afl ef með þarf. Ég var spyr hverju verður þá næst breytt með þingafli og hversu lengi fá niðurstöður almennings á stjórnlagaþingi að standa áður en afli verður beytt til að breyta því í þann farver sem þáverandi húsbændur á Alþingi ákveða.

[G. Valdimar Valdemarsson, 2.4.2009 kl. 14:41]

Sigurður, ég reikna með að þú vísir þessu til mín en ekki Birgis. 

Ég vil byrja á því að segja að þegar Búnaðarbankinn var seldur gat þjóðin skrifað sig fyrir hlut.  Allir sanngjarnir menn sem voru komnir til vits og ára á þeim tíma muna vel eftir því að almenningur skrifaði sig fyrir hlut þúsundum saman.  Hvað almenningur gerði svo við sinn hlut er ekki hægt að skrifa á Framsókn. 

Sá hlutur sem seldur var til svokallaðs S-hóps var seldur hæst bjóðanda, gleymum því ekki.  Það bauð engin betur.   En Landsbankinn var færður vildarvinum íhaldsins, lægstbjóðendum meira að segja með auka afslætti.   Sannleikurinn breytist ekkert þó Morgunblaðið sé notað til að umskrifa hann.

Varðandi stjórnarsetu Framsóknar þá var hún eingöngu í samræmi við kosningaúrslit.  Þú bíður þig varla fram til starfa fyrir land og þjóð bara til að sitja í stjórnarandstöðu.. nema þá að þú sért vinstri grænn.

Þú spyrð hverju verður næst breytt með þingafli?   Þar liggur hundurinn grafinn.  Það er lagt til að breytingar á stjórnarskrá fari í þjóðaratkvæði í stað þess að í dag þarf tvö þing til að samþykkja breytingar og um þær fer aldrei fram málefnaleg umræða hjá þjóðinni.  Það er einmitt það sem íhaldið hræðist svo... málefnaleg umræða um grundvallarmál.