Að bíta höfuðið af skömminni

Morgunblaðið kýs að fjalla um álit meiri og minnihluta í sitthvorri fréttinni í staðin fyrir að hægt sé að lesa fréttina af afgreiðslu nefndarinnar í samhengi á einum stað.  Og til að bíta nú höfuðið af skömminni er álit minnihlutans flokkað sem erlend frétt?   Eru fulltrúar minnihluta á alþingi útlendingar í augum moggans, eða eru það Grímseyingar sem eru útlendingar?

Minnihluti fjárlaganefndar vill fresta afgreiðslu á greinargerð um Grímseyjarferju

Er Morgunblaðið fréttamiðill eða málgagn?

Ég veit að minnihluti fjárlaganefndar lagði fram bókun varðandi skýrslu meirihlutans.  Blaðamaður MBL hirðir ekkert um að segja frá áliti minnihlutans og hlýtur það að vekja eftirtekt og mann til umhugsunar hvort sé meira virði fyrir Morgunblaðið að segja fréttir eða vera málpípa íhaldsins í landinu?  Eða var fréttamaðurinn bara að svíkjast um í vinnunni?

Reglur um flutning fjárheimilda verði skýrari

Hefndin er sæt

Nú er Guðlaugur Þór að nota aðstöðuna til að koma höggi á Alfreð Þorsteinsson, höggi sem hann leitaði að logandi ljósi á meðan þeir sátu saman í stjórn Orkuveitunar.   Loksins getur Gulli litli komið fram einhverjum hefndum, en hvað skyldi stoltið í stráknum kosta skattborgara þessa lands?  Hvað kostar það að leysa upp nefndina í launum og starfslokum?  Hvað kostar það að stoppa verkið og setja nýja aðila í það?  En það er allt í lagi, hann borgar það ekki úr sýnum vasa heldur mínum og þínum.  

Stjórnin tekin af Alfreð Þorsteinssyni

Sjálfstæðisflokkurinn þarf að hugsa sinn gang

Sjálfstæðisflokkurinn hefur barið höfðinu í steininn í stað þess að kanna gaumgæfilega hvort raunhæft og æskilegt sé að taka upp evru hér á landi, segir Valgerður Sverrisdóttir, fyrrverandi utanríkisráðherra.

Nýverið tilkynnti Straumur Burðarrás að uppgjör félagsins og hlutabréf verði skráð í Evrum og kaupþing stefnir á að gera slíkt hið sama. Það hefur vakið upp umræður um hvort Ísland eigi að íhuga að taka upp evru án þess að ganga í Evrópusambandið, umræður sem eru ekki nýjar af nálinni. Fyrir tveimur árum setti Valgerður Sverrisdóttir fram sömu hugmynd sem þá var tekið nokkuð fjálglega, sérstaklega af sjálfstæðisflokknum.

Hún segir það hafa verið eitt af einkennum sjálfstæðisflokksins að berja höfðinu í steininn í stað þess að kafa ofan í málið. Hún sagði flokkinn standa frammi fyrir því að hafa fjárfesta mikið í þeirri skoðun að krónan sé góð og evran sé vond og þessari stefnu og því sé erfitt fyrir þá að skipta um skoðun.

Hún segir stjórnvöld ekki lengur geta setið hjá heldur verða að skoða málið betur enda myndu allar alvöru ríkisstjórnir gera það.

Einar Kristinn Guðfinnsson sjávarútvegsráðherra dregur merkilegar ályktanir út frá þessari frétt sem tekin er af Vísi.

Hann kemst að því að þarna sé ekki verið að gagnrýna Sjálfstæðisflokkinn heldur sé verið að gagnrýna Guðna Ágústsson.  Þetta er merkilega niðurstaða og kannski dæmigerð fyrir það hvernig sjálfstæðismenn nálgast Evrópuumræðuna.  Hún er þeim svo óþægilega að það eru fundin ýmis hálmstrá hér og þar til að komast hjá því að taka efnislega afstöðu til málsins.

Sveiflur í gengi, jöklabréf, erlend lántaka fyrirtækja og einstaklinga, útrás íslenskra fyrirtækja og að maður tali nú ekki um himinhátt vaxtastig verðtryggðar og óverðtryggðar krónu hefur verið tilefni til umræðu í þjóðfélaginu um stöðu krónunnar.   Seðlabankastjóri og fyrrverandi formaður Sjálfstæðisflokksins felur sig bak við skýrslu sem bankinn gerði áríð 1997 til þess að komast hjá óþægilegri umræðu.

Sjávarútvegsráðherra kýs bara útúrnúninga og heimatilbúna Kremlarlógík í stað þess að taka afstöðu í jafn stóru máli. 

Ég verð alltaf sannfærðari og sannfærðari um það að þeir atvinnuvegir sem í eina tíð voru undirstöðu atvinnuvegir þjóðarinnar líða fyrir setu íhaldsins í ríkisstjórn.   Atvinnuvegir sem standa undir atvinnu og búsetu í heilu landshlutunum sitja á hakanum í efnahagsstefnunni og skilaboðin til fólksins eru að koma sér í burtu og taka bara þátt í útrásinni.

Enn sannast hið fornkveðna - allt er betra en íhaldið

Að vera kaþólskari en páfinn

Hvernig getur atvinnulífið búið við svona gerræði?  Ef að fyrirtæki með starfsleyfi þarf að lúta því að endurnýjun starfsleyfis fari til umsagnar í hvert skipti sem tímabundið leyfi rennur út, er þá hægt að búast við að fjárfest sé í húsakynnum búnaði og tækjum?   Ef leyfið er til staðar og samþykkt á að endurnýja það, á meðan forsendur hafa ekki breyst.    Nýjir íbúar í húsum í kring eða þeir sem byggt hafa upp á meðan starfssemin var til staðar eiga ekki að geta rutt þeirri starfssemi er á svæðinu út.  Starfssemi á svæðinu er þekkt þegar nýir aðilar koma og þeir koma á þeim forsendum að þeir vilja vera með þeirri starfssemi sem fyrir er.    Við megum ekki verða kaþólskari en páfinn í regluverkinu.

Endurnýjun starfsleyfis Laugafisks felld úr gildi

Fjölmargar ?

Ef að fjölmiðlafólk er starfi sýnu vaxið hlýtur það að spyrja Ingibjörgu Sólrúnu hvað fjölmargar þjóðir eru margar þjóðir og jafnframt að biðja hana um dæmi eins og 4 eða 5 NATO þjóðir sem kjósa að fara þá leið að greiða í sjóðina en eru ekki með mannskap í Írak.   Á meðan hún styður mál sitt engum dæmum eru þetta fullyrðingar út í loftið og ekki mark á takandi

Ingibjörg Sólrún: Meira mál að senda fólk til Írak en að boða það heim

Íbúalýðræði

Hversvegna vilja VG víkja sér undan því að taka ákvörðun um félagsform OR og skýla sér bak við íbúalýðræðið?   Menn eiga ekki að bjóða sig fram ef þeir eru ekki tilbúnir að standa og falla sínum ákvörðunum í almennum kosningum.   Ef taka á upp íbúakosningar í auknum mæli er mikilvægt að þeim sé skapaður viðeigandi rammi með löggjöf.  Allir vita að kratar í Hf eru uppteknir af því í dag að koma sér undan niðurstöðu um álversstækkun.   Áður en hægt er að viðhafa íbúakosningar í mikilvægum málum þarf að koma ýmsum málum á hreint t.d.  hvenær og hvernig svona kosning bindur kjörna fulltrúa, hver þátttakan þarf að vera, hvað þarf marga til að fara fram á svona kosningu  og hvað niðurstaðan bindur hendur meirihluta til langs tíma.  Þessi atriði verða að vera skýr áður en til svona kosninga kemur, annars koma menn sér undan því með einum eða öðrum hætti að fara að niðurstöðunni.

Eru Samtök iðnaðarins ekki hluti af íslensku atvinnulífi?

Samtök iðnaðarins hafa í mörg ár haldið á lofti þeirri skoðun í krónan sé atvinnulífinu fjötur um fót.  Samtökin hafa talað fyrir inngöngu Íslands í Evrópusambandið og talið að þeim hluta atvinnulífsins sem er í þeirra samtökum muni farnast mun betur ef Ísland gengi í EB.   Það að hvorki Geir Haarde né Davíð Oddsson hafi orðið varir við þessa skoðun eða þrýsting frá samtökunum sýnir að þeir eru í fílabeinsturni og sjá bara það sem þeir vilja sjá og hentar Sjálfstæðisflokknum.  Íslenskt samfélag, íslenskar fjölskyldur og íslensk fyrirtæki geta étið það sem úti frýs.   Flokkurinn hefur talað og svona er þetta bara sama hvað tautar og raular.

Sigurður: Krónan hentar ekki Kaupþingi

Landsbyggðarskattur

Enn á að höggva í sama knérunn og láta landsbyggðina greiða fyrir vandamálin í þéttbýlinu.  Hátt vaxtastig er að sliga fyrirtækin í landinu, hvort sem þau er á landssvæðum þar sem þensla er vandamálið eða á landssvæðum þar sem er samdráttur.   Það virðist alltaf nærtækast að láta einhvern annan bera hitan og þungan af þeim lausnum sem eru fundnar til að leysa vandamál þéttbýlisins.   Væri ekki nær að skattleggja umferð inn á höfuðborgarsvæðið með gjaldhliðum til að draga úr umferð og auka hagkvæmni þess að nota almenningssamgöngur?   Hversvegna eiga íbúar á Patreksfirði að greiða skatt af akstri heima hjá sér til að draga úr svifkryki í höfuðborginni?

Vilja innheimta gjald fyrir notkun nagladekkja

Sprenghlægilegt og fáránlegt

Þetta eru orð sem bankastjóri Seðlabankans viðhefur um þá umræðu sem fram fer í þjóðfélaginu um stöðu krónunnar sem myntar.  Ætli það séu ekki ansi margir hagfræðingar sem viðhafi sömu orð um þá staðreynd að 300 þúsund manna þjóðfélaga sé að burðast við halda úti eigin gjaldmiðli.  Ætli sömu orð eigi ekki líka við um vaxtastigið sem íslensk heimili og lítil fyrirtæki búa við í dag.  Það hefur nýlega komið fram að á Vestfjörðum og Norðurlandi Vestra hefur orðið samdráttur á undanförnum árum.  (Það heitir víst neikvæður hagvöxtur hjá blaðamönnum)  Þrátt fyrir þetta búa einstaklingar og fyrirtæki á þessum svæðum við hæstu stýrivexti í vestrænum heimi, til að slá á þenslu einhverstaðar annarstaðar.   Davíð Oddsson á það til að grípa til stórra orða til að komast hjá að taka málefnalega afstöðu í einstökum málum.  Vandamálið liggur innanbúðar í Sjálfstæðisflokknum, þar forðast menn að ræða viðkvæm erfið mál fram í rauðan dauðan, síðan er skipt um skoðun yfir nótt án undangenginnar umræðu eins og tilfellið var með EES samningin  á sýnum tíma.   Sjálfstæðisflokkurinn er ekki fær um að taka á erfiðum málum vegna átakafælni forystumanna flokksins.   Atvinnulífið og fjölskyldurnar sem eru að sligast undan vaxtaokri seðlabankastjórans verða að skilja að það er Sjálfstæðisflokkurinn sem stendur í vegi fyrir allri vitrænni umræðu um stöðu krónunnar. 

Fáránlegar hugmyndir að taka upp evru án þátttöku í ESB